ជនគំរូរបស់ខ្ញុំ

លោក ប៉ា និង អ្នកម៉ាក់ គឺជាជនគំរូប្រចាំជីវិតរបស់ខ្ញុំ។ បន្ទាប់មក ខាងក្រោមនេះគឺជាជនគំរូទៅតាមផ្នែកនីមួយៗនៃជំនាញរបស់ខ្ញុំដែលខ្ញុំពេញចិត្ត៖

ផ្នែកខាងគ្រួសារ៖

– គំនិតល្អនៃខ្លួនខ្ញុំ គឺជាជនគំរូមួយប្រចាំជីវិតខ្ញុំ។ ខ្ញុំបានរៀនពីខ្លួនឯង បើទោះបីជាពេលនេះ ខ្ញុំមិនទាន់ស្គាល់ពីខ្លួនឯងអស់ក៏ដោយ។ ពេលពិបាកចិត្ត ឬអស់សង្ឃឹមក្នុងជីវិតម្ដងៗ មានតែខ្លួនឯងនេះទេ ដែលនៅជិតខ្ញុំចាំលើកទឹកចិត្តខ្ញុំ។

អរគុណរចនាដែលបានថតឲ្យ

– លោកតាទួត តេង លី (តាបង្កើតរបស់ខ្ញុំ) សព្វថ្ងៃ គាត់គឺជាមនុស្សម្នាក់ដែលមានព្រះជន្ម ដល់ទៅជិត៨០ព្រះវស្សា។​ គាត់គឺជាអ្នកដែលបានប្រាប់រឿងរ៉ាវពីមុនៗដែលគាត់បានជួបប្រទះដល់ខ្ញុំ សម្រាប់សិក្សាដើម្បីធ្វើដំណើរប្រចាំជីវិត។ ខ្ញុំស្រឡាញ់គាត់ណាស់។

ផ្នែកខាងក្រៅ-សម្រាប់ក្នុងប្រទេស៖

– លោកតា​ ស៊ីន ស៊ីសាមុត៖ ខ្ញុំតែងតែចាត់ទុក លោក ស៊ីន ស៊ីសាមុត ជាជីតារបស់ខ្ញុំមួយរូប ដែលបានបង្រៀនខ្ញុំ ពីជីវិត​ថ្លៃថ្នូរតាមរយៈបទចម្រៀងដ៏មានតម្លៃរបស់លោក។ លើសពីនេះទៅទៀត​ ចម្រៀងលោកបានបង្រៀនខ្ញុំឲ្យចេះនិពន្ធបទភ្លេង និពន្ធទំនុកច្រៀង ច្រៀង សម្រួលតន្ត្រី លេងឧបករណ៍ ស្គាល់ឧបករណ៍ ដឹកនាំខ្សែភាពយន្ត និងច្រៀងជាដើម។ ពិសេសជាងនេះទៅទៀត ទស្សនៈរបស់លោកបានបង្រៀនខ្ញុំ ឲ្យស្រឡាញ់ជាតិខ្មែរ ស្គាល់អត្តសញ្ញាណជាតិ ពិសេសស្គាល់ពីចរិតខ្មែរ និងភាពថ្លៃថ្នូរដែលលោកមាន។ សូមអរគុណលោក!!!